Қазақстан Республикасының Конституциясы күні қарсаңында Кардиология және ішкі аурулар институтының негізгі кіреберісі ашылды. Кіру тобы күрделі жөндеуден өтті, бұл оның функционалдығы мен қауіпсіздігін арттырып, келушілерге жайлылықты қамтамасыз етті. Ғимарат 40 жылдан астам уақыт бұрын пайдалануға берілген.
Іс-шараға ҚР Денсаулық сақтау вице-министрі Тимур Мұратов, С.Асфендияров ат. ҚазҰМУ ректоры Марат Шоранов, Алматы қ. Қоғамдық денсаулық сақтау басқармасының басшысы Марат Пашимов және институттың Директорлар кеңесінің төрағасы Еркін Дүрумбетов қатысып, ұжымды Конституция күнімен құттықтап, алғыстарын білдіріп, еңбектеріне табыс тіледі.
«Институтта озық технологиялар, жоғары сапа стандарттары, ең бастысы, әрбір пациентке деген адами қарым-қатынас және дәрігерлеріміздің кәсіби шеберлігі біріктірілген. Біз үшін әр пациент пен персоналға қамқорлық жасау маңызды. Адамның сауығуы тек ілтипат пен адам жылуынан ғана емес, сонымен қатар әдемі, жайлы ортаға да байланысты»,- дейді басқарма төрағасы Рүстем Төлеутаев.
«Бұрынғы басшы Марат Орынбасарұлы Пашимов инфрақұрылымды жаңғыртуға, науқастар мен қызметкерлердің қауіпсіздігін, сондай-ақ медициналық көмектің сапасын арттыруға бағытталған ауқымды жұмыс атқарды. Негізгі кіреберіс, қабылдау бөлімшесі, клиникалық диагностикалық зертхана, консультативтік-диагностикалық орталық, барлық бөлімшелер қайта жаңғыртылып, жаңартылды, соңғы буын жоғары технологиялық жабдықтар алынды, жаңа технологиялар енгізілді», — деп бөлісті бірінші басшы.
Әсел Ілиясова, кардиолог, Жас ғалымдар кеңесінің төрайымы: «Біз өміріміздің басым бөлігін клиникада өткіземіз. Басшылықтың жан-жақты қолдауын — кәсіби тұрғыдан ғана емес, сонымен қатар біз үшін қолайлы жағдай жасап жатқанын бағалаймыз. Кіреберіс және бүкіл институттың жаңа заманауи келбеті адамның көңіл-күйіне де әсер етеді: үйлесімділік пен эстетика жаңа мақсаттарға жетелеп, еңбек етуге деген құлшынысты арттырады».
Пациент Мәрзия Мұқашева: Мен кардиология бөлімшесінде стационарлық ем қабылдап жатырмын. Қабылдау бөлімшесінен бастап тәртіп пен тазалықты сезінесіз. Толыққанды ем алуымызға барлық жағдай жасаған институттың басшылығына алғысым шексіз. Мұндағы дәрігерлер мен мейіргерлер – жоғары білікті, өз ісінің мамандары. Әр науқастың көңілін табуға тырысады, жұмыстарына адал».
Былтыр басшылық субұрқақ та салды. Бұл шағын саябақ пациенттерге сауығуға және олардың көңіл күйі мен денсаулығын жақсартуға ықпал ететіні сөзсіз, өйткені табиғат емдейді деп бекер айтылмаған.
Ұжым Мемлекет басшысының «Таза Қазақстан» бастамасын қолдайды. Экология да салауатты өмір салтының бір бөлшегі. Аумақтарды абаттандыру және көгалдандыру халықтың өмір сүру сапасын арттыруда маңызды рөл атқарады.
2024 жылы КІАҒЗИ халықаралық стандарттарға сәйкестігін тағы да растап, JCI қайта аккредиттеу рәсімінен өтті. Сол жылы институт тағы да Ұлттық аккредитацияның жоғары санатын растады.
Институт әлемнің жетекші медициналық орталықтарымен ынтымақтастық орнатты. Медициналық туризмді дамытуда біздің әлеуетіміз зор. Бізге республиканың барлық облыстарынан және алыс-жақын шетелдерден емделуге адамдар көп келеді.
Биыл институттың алдында кадрлық әлеуетті нығайту, емдеу мен диагностиканың инновациялық әдістерін енгізу, жоғары технологиялық медициналық қызмет бойынша орындалатын араласулар көлемін ұлғайту, білім беру қызметін дамыту, жоғары оқу орнынан кейінгі білім беру, ғылымды одан әрі дамыту және т.б міндеттер тұр.